Innu Takuaikan Uashat mak Mani-Utenam

Nation ITUM

INNU TAKUAIKAN UASHAT MAK MANI-UTENAM

 

ITUM utinnima eukuanat innuat shash 7 000 tatunnuepipuna ka ishpish taht ute ume aishinakuak assi Uepishtikueiau mak Labrador-assi. Ishpish eka shuka tat atiku anite nutshimit anite ut e tshitapatakanit XIX tatumitashumitunnuepipuna mak ka tshipaikanit ka mishkutunamatunanut ushakai, mitshet innuat ekue nakatahk unatau-assiuau, eshpitapipuk e uitakanit, tshetshi nashipeht.

Ishinakuannipan upakassiun innu ka pimutet assit tshetshi ut nataut, kusset, ushakaia-aueshisha tshetshi ishi-nataut mak ka maushunanut. Katshi pipun-apiht nutshimit anite tatipan unatau-assiuat, anitshenat kautishkuemiht ekue nashipeht tshetshi natshi-shikuan-taht uinipekut nenu Tshemanipishtikunu mak Mishta-shipinu e apashtaht. Napinnit, ITUM utinnima ekue mishta-mamuituht ekue makusheht, ashit mishta-aiamiananu mak etauatsheht ushakamuaua. Minuat tekuatshik eukuannu eieshkuiht tshetshi minuat kushpiht nete unatau-assiuat.

Anutshish kashikat, passe ITUM utinnima anite tauat innu-assit Uashat, tshiuetinussit itetshe ne utenau Uashat, mak Mani-utenam, 16km etatutipaikaneshkat mamit anite ut Uashat. Ka tshimatakaniti nenua innu-assia, ne ushkat anite pipun 1906, eku ne kutak 1949, peiku ne innu-assi 117 hectares eshi-tipaitshenanut eshpishat, eku ne kutak 527 hectares eshi-tipaitshenanut.

Nenua nishu innu-assia peikuieuat innu-utshimaua mak peikushteu nekausseieuat. Innu-takuaikan tshitapatamu tshishe-utshimau-aitunnu, eku ne katipenitak mishue ka tshitapatak mashinaikanitshuapinu mak nenua kupaniesha uatshi-atussemikut ueuetashuapatamuat mashinaikana mak kupaniesha mak ne aishpanit anite mashinaikanitshuapit.

Uashat mak Mani-utenam innuat eshku kanuenitamuat utaitunnuau mak nenu uinuau ka pet eshinniuht. E tshitapatakannit utaitunnuau, uitamimuatau umenua eshku niashahk utinniunnuau : kusseuat utshashumekua, nishka nutshieuat mak atikua mak passe nenua ushakaia-aueshisha miam ne amishku e uinakanit, ushakaia nenua tshetshi maunaht. Iapit kutakanu utaitunnuau meshta-itenitahk eukuannu utinniunnuau mak utapueienitamunnuau.

Anutshish kashikanit nishuait ishi-nashamuat aitunnu, innu-aitunnu mak kakusseshiu-aitunnu miam ne e uitakanit kakussenanut mak ushakai ka ishi-nataunanut kie ne katshimakaitshenanut, kamanutshenanut, ka autashunanut, kusseutshuapa, kaimitunanut, katipaitshenanut, atusseun e tshitapatakanit anite mamu ka tananut mak innu-atusseun.

Nenua nishu innu-assia e tshitapatakaniti, uiesh 50 atusseutshuapissa takuana tatipan aishinakuaki miam mitshishutshuapissa, atauitshuapissa, kaikussenanut e tshitapatakanit mak e aitutuakanit namesh kassinu aishinakushit, kakussikuashunanut, ashtunutshenanut, e ueuetashtakaniti mak e ueuetashuapatakanit anite mianukashunanut, tshetshi minunakutakanit uashka assi, ka mamishati utapana, uashtenitamakana, ka uauitshiakaniht anitshenat tshe ueuetashueht, ka minunakuiakanit auen utashtamikut kie ma uiat mak ka ashushtakaniti mashinaikan kie ma e ashu-uitamatsheht auen uetshimau-aiminannut.

Kie, ITUM utinnima  kanuenitamuat ka mishanit atauitshuapinu shash anite ut ne pipun 1976. Anite Uashat tshematet, Kamishat-atauitshuap les Galeries Montagnaises eshinikatet anite tekuaki 40 atauitshuapissa mak eshpishat 285,000 tatushit e kashkatshat.

Shaputuan mitshuap, ka shenak 1998 pipunnu, iapit anite Uashat takuan. Ishinakuannu utatusseun tshetshi ashu-patshitinak aimunnu mak tshetshi mishituepanitat innu-aitunnu.

Kashikat, nenua nishu innu-assia e tshitapatakaniti sheshakan tshipa itashuat innuat 3 000. Anite ne pipun 2010, ITUM utinnima uiesh 700 kakusseshit tanua.

ITUM utinnima utinnu-aimunnuau apashtauat, eku anite etashiht tauat mishtikushiu-aimunnu ka tshi apashtaht.

Anu ui tshissenitamekui, ute ituteuat http://www.itum.qc.ca/.