Nation Naskapi de Kawawachikamach

NNK

ᓇᔅᑲᐱ ᐃᔪᐅᒡ ᐅᑦ ᑲᐛᐛᒋᑭᒪᓯᒡ 

 

ᓇᔅᑲᐱ ᐃᔪᐅᒡ ᑭᔭ ᐅᑕᓂᔅᑯᑕᐸᓂᒧᐛᐛ ᓇᓂᑎᒻ ᒋᐊᐱᒋᑕᐅᒡ ᐱᑎᓱ ᑲᐃᑎᓯᓇᑕᐃᑭᓄᐃᒡ ᑯᐸᒃ ᑭᔭ ᓇᐱᑥᐤ ᐃᔅᐱᔅ ᓇᔅᒐ ᓇᑦ ᐛᔅᑭᒡ ᐊᔅᐱᔅ ᒋᔅᒋᑕᑭᓄᐃᒡ᙮ ᓇᔅᑲᐱ ᐃᔪᐅᒡ ᐛᔅᑭᒡ ᑲᐱᐸᒥᐱᒡ ᐃᔪᐅᒡ ᒋᓯᔪᐅᒡ, ᐊᓇᓴᐛᒡ ᐊᑎᒂ ᐊᑐᑕᐃᒋ ᐅᑦ ᐊᑦᓯᓐ ᐱᔾ Hudson Bay ᑲᐃᓯᓂᑲᑕᐃᒡ, ᓴᐅᓂᒡ ᓇᓯᐸᑎᒥᒡ  ᐅᑦ ᐊᓂᑲᐸ ᐱᔾ Ungava Bay  ᒋᐛᑎᓄᒡ ᐅᑦ ᐅᑕᓇᐤ Labrador City ᓇᑕ ᓴᐅᓂᒡ᙮ ᑲᒋᒋᐱᓇᓄᒡ ᐎᐱᒡ 19th century, ᒪᑎᓄᐤ ᒋᑭᒐᒥᑕᑭᓄᐛ ᐛᐃᐱᓯᔅ ᑭᔭ ᒧᑯ ᐊᓯᓇᒂᒡ ᒋᓯᑯ ᓇᑕ ᑕᑐᐃᒡ ᑲᒋᒥᑕᑭᓄᒋ ᑕᐛᐅᒍᐛᐸ, ᑭᒥᐱᓂᔪᐤ ᑕᐛᐅᒍᐛᑉ, ᐅᑦ ᐃᑕᒐ ᑭᔭ ᓇᑕ ᐃᑕᒐ ᒋᒋᐊ ᑲᒥᔪᐛᑕᑭᓄᒡ, ᓇᓂᑎᒻ ᑲᓂᑐᐎᐅᓇᓄᒡ ᐅᑦ ᐃᑕᒐ ᓂᐱᔾ Indian House Lake ᐅᑦ ᒧᓱᐛᐤᓯᐱᒡ᙮   

 

ᑭᒥᐱᓂᔾ ᑕᐛᐅᒍᐛᑉ Hudson Bay Company ᑭᔭ ᑯᑎᑭᔪ ᒐᑲᓂᔪ ᐊᒥᔪᐛᐃᑕᒡ ᓇᔅᑲᐱ ᐃᔪᐅᒡ ᑕᑐᐃᒡ ᑲᔭᑐᒐᒡ ᑕᑥᐤ ᑲᐃᑎᔅᑕᒋ ᐱᐳᓇ 1800s ᑭᔭ ᐃᔅᐱᔅ ᐊᑕᑕᐅᐱᒡ 1900s, ᐊᒋᑕᐸᑕᑭᓄᒡ ᓄᑎᒻ ᒐᒂᓂᔪ ᑲᐃᓯᓄᑕᐱᐃᒡ ᑭᔭ ᐊᓴᐸᐃᑕᒡ ᑯᑎᑲ ᒐᒂᓇ᙮ ᒋᒋᐛ ᑲᐃᓯᐱᐸᒥᐱᐃᒡ ᑲᐃᔅᐱᐃᒡ ᐅᑦ ᑭᒥᓯᓇᑕᐛᓂ : ᐛᔅᑭᒡ ᑈᑦ ᒐᐃᒧ, ᐛᔅᑲᐃᑭᓐ,  (ᑲᒥᒡ ᐅᑦ ᑯᒃᓱᐛᒃ ᓯᐳ, ᐅᑦ ᐊᓄᒡ ᐊᑎᒂᒡ ᑯᒍᐛᒃ) ᐱᐳᓐ 1831 : ᐃᔅᐱᔅ ᑈᑦ ᓇᔅᑯᐱ ( ᒥᒋᒪ ᐸᑎᓯᑯᐸᐤ` ᓂᐱᔾ ) ᐅᑦ ᓇᐱᑥᐤ, ᐱᐳᓐ 1842; ᐃᔅᐱᔅ ᑈᑦ ᒪᑲᓂᓯ ᐛᔅᑲᐃᑭᓂᓯᔅ ( ᐅᑦ ᐃᑕᒐ ᒥᒋᒪ ᑲᓂᔭᐳᔅᑲᐤ ) ᐱᐳᓐ 1915; ᐃᔅᐱᔅ ᑈᑦ ᒐᐃᒧ, ᐛᔅᑲᐃᑭᓐ, ᐃᔅᐱᔅ ᐱᐳᓐ 1948᙮ ᐃᔅᐱᔅ ᓴᐱᐸᐤ ᐱᐳᓐ 1956᙮

 

ᐱᐳᓐ ᑲᐃᑎᔅᑕᒡ 1956 ᐃᔅᐱᔅ 1983, ᓇᔅᑲᐱ ᐃᔪᐅᒡ ᒪᒧ ᒋᐅᒋᐎᑎᐱᒪᐅᒡ ᐛᓴᐎᔪᐛ, ᐃᓄᐤ ᐅᑦ ᒪᑎᒪᑯᔅ ᓇᒃ ᒠᓐ, ᓇᑕ ᓇᒃ ᒠᓐ ᐃᔅᐱᔅ 1972, ᑭᔭ ᓇᑦ ᓇᓇᒐ ᐅᑦ ᒪᑎᒪᑯᔅ ᐃᔪᔅᒋᔾ᙮

 

ᐱᐳᓐ 1983, ᓇᔅᑲᐱ ᐃᔪᐅᒡ ᑲᑎᐱᐃᒡ ᓇᑦ ᐃᑕᒡ ᑲᐛᐛᒋᑭᒪᓯᒡ, ᒥᒋᒻ ᐊᑎᒂᒡ ᑲᐃᑎᓯᓇᑕᒡ 55th parallel ᐊᔅᒋᔪᒥᓯᓇᐃᑭᓂᒡ ᐅᑦ ᒋᐛᑎᓄᒡ ᑯᐸᒃ᙮, ᒥᒋᒪ ᐊᑎᒂᒡ ᑲᐃᑎᓯᓇᑕᐃᑭᓄᒡ ᓇᐱᑥᐤ᙮ ᐃᔅᐱᓯᓇᑯᓐ ᒐᓯᑲᓐ 15 km ᒋᐛᑎᓄᒡ ᐅᑦ ᐅᑕᓇᐤ ᓴᐱᐸᐤ ᑭᔾ 525 km ᐃᔅᐱᓴᐤ ᐃᔅᑯᑕᐅᑕᐸᓂᒪᔅᑭᓄ ᐊᐱᒋᑕᑭᓄᒡ, ᒋᐛᑎᓄᒡ ᐛᓴᒡ᙮

 

ᑲᐛᐛᒋᑭᒪᒡ ᑲᒋᒥᑕᑭᓄᒡ ᑲᒋᒋᐱᓇᓄᒡ ᐱᐳᓐ 1980 ᐃᔅᐱᔅ ᐱᐳᓐ 1983, ᒐᒋᒥᓯᓇᑕᐅᑎᓱᓇᓄᐃᒡ ᐱᐳᓂᔪ 1978, ᓇᔅᑲᐱ ᒋᐛᑎᓄᒡ ᑯᐸᒃ ᓂᔅᑯᒧᐅᓐ, ᐅᑦ ᑲᓇᑕ ᓂᓱ ᐊᑎᒂᒡ ᒐᔅ ᐅᔅᑭᒡ ᐊᓄᒡ ᓂᔅᑯᒧᐅᓐ ᐅᑦ ᒪᓯᓇᓱᒡ, ᑯᐸᒃ ᒋᓴᐅᒋᒪᐤ, ᑲᓇᑕ ᒋᓴᐅᒋᒪᐤ ᑭᔭ ᓇᔅᑲᐱ ᐃᔪᐅᒡ ᐅᑦ ᓴᐱᐸᐤ ᐃᔪᐅᒡ ᒐᐃᓯᐎᔭᑭᓄᒡ, ᑭᔭ ᑯᑎᑭᒡ ᐊᐛᓂᒋ᙮

 

ᐸᐃᑯ ᑲᐃᑎᔅᑕᒡ ᐊᔅᒋᔾ Category 1A-N ᐅᑕ ᒐᒥᑕᒡ ᐃᔪᔅᒋᔾ ᐊᔅᐱᓴᒡ ᐛᔅᑲ 41᙮44 km 2 ᒐᑲᑦ ᐸᑯᑕᐤ ᐃᓯᒋᑕᐸᑕᑭᓄ ᒧᔭᒻ ᑯᑎᒃ ᐃᔪᔅᒋᔾ, ᒧᑯ ᐱᑎᑭᒥᒡ ᑯᐸᒃ ᐊᔅᒋᔾ ᐅᑦ ᑲᓱᒥᔭᑭᓄᑦ ᑲᓇᑕ ᒋᓴᐅᒋᒪᐤ ᒐᒋᐎᒋᐛᑦ ᐊᐱᒥᑲᑭᓄᐃᒡ ᐃᔅᔪᔅᒋᔪ ᒐᒋᐊᐱᒋᑕᐃᒋ ᓇᔅᑲᐱ ᐃᔪᐛ᙮

 

ᐱᐳᓐ 1984, ᒋᒥᔅ ᐱᔾ ᐃᔪᐅᒡ - ᓇᔅᑲᐱ (ᐅᑦ ᑯᐸᒃ) ᐎᓱᐛᐅᓐ Cree-Naskapi (of Quebec) Act, ᑲᓇᑕ ᐅᔅᑭᒡ ᐃᔪᐤ ᒋᓴᐅᒋᒪᐅᓐ ᒋᓴᐅᒋᒪᐤ ᐃᑎᓱᐛᐅᓐ, ᑲᒥᓯᓇᑕᐅᑎᓱᓇᓄᒡ, ᑲᓱᒥᔭᑭᓄᒡ ᓇᔅᑲᐱ ᐃᔪᐅᒡ ᐅᑦ ᑯᐸᒃ, ᐊᒥᓴᐃᒡ ᓱᒋᔪᓂᔪ, ᑎᐸᐃᑎᒧᓇ ᐅᑦ ᒐᒋᐱᒥᐱᒋ ᐅᑦ ᐱᑎᑭᒥᒡ ᐃᔪᔅᒋᒡ ᐃᔪᐤ ᑎᐸᐃᒥᓱᐅᓐ ᒋᓴᐅᒋᒪᐤ ᐅᑦ ᐛᒋᐱᐃᑦ ᑲᓇᑕ ᒋᓴᐅᒋᒪᐅᓂᒡ, ᐊᓄᒡ, ᐊᒥᔭᑭᓄᒡ ᓇᔅᑲᐱ ᐃᔪᐅᒡ ᐅᑦ ᑯᐸᒃ ᐊᑐᐎᔅ ᒐᒋᑎᐸᐃᒥᓱᒡ ᐃᔅᐱᔅ ᑯᑎᑲ ᐊᑕᑐᔅᑲᓇᓯᒋ ᐃᔪᐤ ᐊᔅᑯ ᐅᑦ ᐊᐱᒥᐱᒋ ᐃᔪᐤ ᐎᓱᐛᐅᓂᔪ (Indian Act)᙮ ᑲᐃᓯᓂᑲᓱᒡ, ᓇᔅᑲᐱ ᐃᔪᐅᒡ ᐅᑦ ᑯᐸᒃ, ᒂᑦ ᒥᔅᑯᑎᓂᑭᓄᒡ ᐅᔅᑭᒡ ᑲᐃᓯᓂᑲᓱᒡ ᓴᐱᐸᐤ ᐃᔪᐅᒡ, ᐅᑦ ᑲᐅᒋᐱᐃᒡ ᐅᑦ ᑲᓇᑕ ᐊᔅᑯ ᐃᔪᐤ ᐎᓱᐛᐅᓐ Indian Act ᐅᑦ ᒋᓴᐅᒋᒪᐅᓂᒡ ᑲᔅᑕᑭᓄᒡ ᑲᐃᑎᔅᑕᒡ ᐱᐳᓐ 1971᙮ ᓂᔅᒋᐱᓯᒻ 1996, ᐃᔪᒋᒪᑲᓂᒡ ᒂᐃᔅᒋᔄᑦ ᒐᒋᒥᔅᑯᑎᓂᑭᓄᐃᒡ ᐊᓯᓂᑲᑕᑭᓄᒡ ᓇᔅᑲᐱ, ᒂᑕ ᐃᓯᓂᑲᑕᑭᓄᒡ ᓇᑲᐱ ᐃᔪᐅᒡ ᐅᑦ ᑲᐛᐛᒋᑭᒪᓯᒡ᙮ ᑲᒥᔅᑯᑎᓂᑭᓄᒡ ᑲᒋᒋᐱᐃᒡ ᐊᓯᒺᑯᐱᓯᒻ 1999᙮

 

ᓇᔅᑲᐱ ᒋᐛᑎᐅᓄᒡ ᑯᐸᒃ ᓂᔅᑯᒧᐅᓐ ᑲᐛᑎᔅᑕᑭᓄᒡ ᓇᔅᒐ ᐊᔅᑕᐃᑕᑭᓄᒡ, ᑲᐃᑕᐃᑕᑭᓄᒡ ᐊᔅᑯ ᐅᑕᓇᐤ, ᓴᐱᐸᐤ ᐊᐱᒥᐱᐃᒡ ᐅᑦ ᑲᓄᑎᓯᓇᓄᒡ, ᑲᒧᓇᐃᒐᓄᒡ ᓂᑲᓐ ᑲᓱᒐᐃᒧᓇᓄᒡ, ᑲᐃᓯᒋᑕᐸᑕᑭᓄᒡ᙮ ᒐᐸᐃᑭᓄᒡ ᐊᑐᔅᒐᐅᓐ, ᓯᓂᔾ ᑲᒧᓇᐃᒐᓄᒡ, ᒧᑯ ᐱᑕᑕᒡ ᑕᑎᐳᓇ ᒋᐎᒪᐱᔪ ᑲᒋᐸᐃᑭᓄᒡ ᐊᑐᔅᒐᐅᓐ, ᓯᓂᔾ ᐊᒧᓇᐃᒐᓄᒡ, ᑲᒋ ᐱᑕᑕᒡ ᑕᑎᐳᒡ ᒪᓯᓇᑕᐅᑎᓱᓇᓄᒡ ᓂᔅᑯᒧᐅᓐ ᐊᒥᔪᒋᑕᐸᑕᑭᓄᒡ ᒐᒋᐱᒥᐱᐃᒡ ᓇᔅᑲᐱ ᒋᐛᑎᓄᒡ ᑯᐸᒃ ᓂᔅᑯᒧᐅᓐ Northeastern Quebec Agreement ᑲᐃᑎᔅᑕᒡ ᐱᐳᓐ 1990᙮ ᑯᑎᑲ ᒐᒂᓇ, ᐃᑎᔅᑕᐤ ᓂᔅᑯᒧᐅᓐ ᒐᒋᒋᒥᑕᑭᓄᒡ ᒐᒋᑎᒂᒡ ᓱᓇᔭᐤ ᒐᒋᑐᔅᑲᐛᒐᓄᒡ, ᒐᐱᒥᑲᑭᓄᒡ ᐃᔪᔅᒋᔾ ᐃᔅᐱᔅ ᑲᒋᐱᑕᑕᒡ ᑕᑎᐳᒋ ᑭᔭ ᒐᒋᒋᒥᑕᑭᓄᒡ ᑲᒪᒧᐎᓇᓄᐃᒡ ᒐᒋᐎᑕᒡ ᓇᔅᑲᐱ ᑐᔅᒐᐅᓂᔪ᙮      

 

ᓇᔅᑲᐱ ᐃᔪᒋᒪᑲᓂᒡ ᑕᑎᓱᒡ, ᐸᐃᑯ ᐃᔪᒋᒪᐤ ᑭᔭ ᐱᑕᑕᒡ ᐃᔪᒋᒪᑲᓂᒡ᙮ ᓇᔅᑲᐱ ᐃᔪᐅᒡ ᓇᑲᓄᑕᐃᑯᒡ ᐃᔪᒋᒪᐛ ᑭᔭ ᐃᔪᒋᒪᑲᓇ, ᑲᐃᑕᔭᑭᓄᒡ ᐃᔅᐱᔅ ᓂᔅᑐᐳᓇ᙮

 

ᓇᔅᑲᐱ ᐃᔪᐅᒡ ᑕᑎᓱᐅᒡ 1,128 ᐊᐛᓂᒋ ᒥᒋᓱᐱᓯᒺ 31, 2011, 842 ᐊᐛᓂᒋ ᐊᐳᒡ ᐱᑎᑭᒥᒡ ᐸᐃᑯ ᑲᐃᑎᔅᑕᒡ ᐊᔅᒋᔪ ᒥᒋᓱᐱᓯᒺ 31, 2011᙮ ᐊᑕᑎᓯᓇᓄᒡ  ᒐᔅ ᒐᓯᑲᓐ ᓂᔄᐤ ᐃᔅᐱᒐᑎᓇᓄ ᐅᑕᒡ ᑲᑕᑎᓯᓇᓄᒡ ᐅᑕᒡ 20 ᐱᐳᓇ᙮ ᒥᒐᑐᒡ ᐛᓯᒡ, ᑭᔭ ᒐᓯᑲᓐ 60% ᐊᓇᒡ 30 ᑕᑎᐳᓇᓱᒡ᙮

 

ᒋᒋᐛ ᒥᒐᑦ ᓇᔅᑲᐱ ᐃᒧᐅᒡ ᐅᑎᒧᓄᐛᐤ, (ᓇᔅᑲᐱ ᐃᒧᐅᓐ)᙮ ᓄᑎᒻ ᒧᑯ ᐊᒐᔪᐅᒡ ᓇᔅᑲᐱ ᑲᑭᔭᓴᐅᐃᒧᐅᒡ᙮ ᒥᒐᑦ ᔭᐱᒡ ᓂᔅᑐᑎᒧᐅᒡ ᑭᔭ ᐃᒧᐅᒡ ᐃᓄᐤ (ᐛᓴᔨᔪᐅᒡ) ᐃᒧᓂᔪᐤ᙮ ᐱᔅᒐ ᒧᑯ ᓇᔅᑲᐱ ᓂᔅᑐᐛᐸᑎᒧᐅᒡ ᐛᒥᔅᑎᑯᓯᔨᒧᓂᔪᐤ᙮

 

ᒥᒐᑦ ᓇᔅᑲᐱ ᐊᔅᑯ ᒋᒋᐛ ᓇᓴᒧᐅᒡ ᐊᐃᓯᓇᑯᓂᒡ ᐛᔅᑭᒡ ᑲᐃᓯᔪᐅᒡ ᑭᔾ ᐅᑎᔪᓄᐛᐤ᙮ ᒧᔭᒻ ᒥᒐᑦ ᒋᐛᑎᓄᒡ ᐅᑕᓇᐛ, ᓇᔅᑲᐱ ᐃᔪᐅᒡ ᐊᔅᑯ ᒋᒋᐛ ᓂᑐᐎᐅᒡ, ᓂᑐᓂᒪᓴᐅᒡ, ᑭᔭ ᓂᑐᒪᓂᔪᐅᒡ ᐛᒋᐱᐃᒡ ᐱᔅᒐ ᐅᒥᒋᒧᐛᐤ ᑭᔭ ᑯᑎᑲ ᒐᒂᓇ ᒋᒋᐛ ᔭᐱᒋᑕᑭᓄᒋ᙮ ᓄᒋᒥᒡ ᐛᒋᐱᑲᔅᒋᔪᓇᓄᒡ ᐊᑯᐅᓐ ᒋᒋᐛ ᓇᔅᑲᐱ ᐃᔪᐅᒡ ᐊᔅᐱᑕᐃᑕᒡ᙮

 

ᐊᑐᐎᔅ ᐎᓇᓂᑐᔅᒐᐃᑎᒻ ᐃᒧᐅᓐ, ᒪᐅᑕ ᒐᐃᑐᑕᐃᓐ ᑲᒥᓯᓇᐃᒐᐱᒡ ᐊᑎᔅᑕᒡ http://www.naskapi.ca/