Nation Innu Matimekush-Lac John

NIMLJ

NIMLJ utinnima eukuanat innuat shash 7 000 tatunnuepipuna ka ishpish taht ute ume aishinakuak assi Uepishtikueiau mak Labrador-assit. Ishpish eka shuka tat atiku anite nutshimit anite ut e tshitapatakanit XIX tatumitashumitunnuepipuna mak ka tshipaikanit ka mishkutunamatunanut ushakai, mitshet innuat ekue nakatahk unatau-assiuau, eshpitapipuk e uitakanit, tshetshi nashipeht.

Anite ne pipun uet tshitshipanit mak anite apituet 1950, NIMLJ utinnima tshimatapanat utinnu-assiuau anite Kaitushkannut. Anite ut 1973, NIMLJ utinnima innu-pimipanuat ne e tshitapatakanit Innu-ueuetashueun; ueshkat, Kanata-tshishe-utshimau eshku ishi-utinepan nenua innua miam Uashat ut innua. NIMLJ utinnima anite ut ueuetashuapamakanuat Innu-takuaikanit peiku innu-utshimaua mak neu nekausseieua, nanishupipuna ka tshimanakaniht ne e nashakanit Innu-ueuetashueun.

Anite Kaitushkanut iapit nishina anite innu-assia : Matimekush mak Lac John (Naupineiku). Nenua e nishiti innu-assia anite takuana assit ka ut ueuetashuapatet Tshiuetinit, anite ne aishinakuak assi eshi-uitakanit Kaniapishkau. Innu-assi Matimekush anite e naneuiat takuan ne shakaikan Pearce, eku ne innu-assi Lac John anite takuan uiesh 4km eshi-tatutipaikanashkat mamit Kaitushkannut. Nenua nishu innu-assia Lac John mak Matimekush tshimatakanipani anite 1960 pipun, eku ne kutak 1968, katshi ne ashupanitakaniti assia anite ka takuaki Uepishtikueiau mak Kanata-tshishe-utshimat. Katshi tshipaikanit kanutashinenanut Kaitushkanut, anite ne pipun 1982 kie mitshet kakusseshiht ka tshituteht, ne katakuaitshet anite kaussei ekue mishitat, anite nissi-pishimua, innu-assinu Lac John ushkat ka ishpishat 14,8, eku anutshish eshpishat 70,9 hectares. Eku ne e uitakanit, innu-assi Lac John nuash 23,3 hectares eshi-tipaitshenanut eshpishat. Kaitushkanut  innuat anutshish ishi-uinitishuat Naupinekunnuat, ne ua issishuemakak « Innuat anite ut Naupineiku ». Iapit umenu ishi-uinitishuat Schefferville-innuat (Kaitushkanut-innuat). Tshishennuat iapit ishi-uinitishuat “Mishta-shipiunnuat”, kie ma “innuat anite ut Mishta-shipit”. Anitshenat Mishta-shipiunnuat Uashaunnuat anitshenat, Uashat uetuteht.

Tshishe-pishimu 2009, NIMLJ itashinua utinnima 838, 718 anite peiku nenu innu-assinu etaht. Katipi-atshimakaniht innuat anite ne pipun 2006, uiesh 40% itashuat uiesh nashinnuepipuneshiht. NIMLJ utinnima utinnu-aimunnuau apashtauat, eku mitshetuat mishtikushiu-aimunnu e apashtaht uinuau anite kau e aimitutaui.

Upakassiunnuau eshi-nashahk eukuan innu-atusseun, atauitshuapa, kamanutshenanut. Anitshenat innuat etusseht anite ut unuipanitakanu Innu-takuaikanit, uin Innu-takuaikan uieuetashuapatak pakassiunnu anite innu-assit. Matimekush mak Lac John innuat eshku mitshet kanuenitamuat utaitunnuau kie nenu ka pet ishinniuht. Miam kutaka innu-assia ute Tshiuetinit, ishi-pakassiuat kanataunanut, kakussenanut mak ushakai ka ishi-nataunanut mak ushakai e apatshiaht kie ma utatusseuakannuaua tshetshi tutahk. Kie, mekuat mamashitakannu nenu uinuau utapueietamunnuau.

Anu ui tshissenitamekui : http://www.matimekush.com.

.